JCh-2026 finali chiptasi narxi rekord darajada oshdi

Kelasi yili AQSH, Kanada va Meksika mezbonlik qiladigan jahon chempionati finali uchun chiptalar narxi barchani hayratda qoldirdi. FIFA rasmiy sayti va tizimida kuzatilgan so'nggi ma'lumotlarga ko'ra, hal qiluvchi bahs uchun chipta bahosi 11,5 million dollargacha ko'tarilib ketgan.

Albatta, bunday astronomik raqamlar oddiy muxlislar uchun ochiq bozor narxlari emas, balki qayta sotish platformalaridagi yoki spekulyativ takliflar bo'lishi mumkin. Shunga qaramay, mazkur holat futbol tarixidagi eng qimmat chiptalar qatoridan joy oldi.

Mutaxassislar bunday qimmatbaho chiptalarning ortida qandaydir texnik xatolik yoki ultra-VIP toifadagi xizmatlar yashiringan bo'lishi mumkinligini ta'kidlashmoqda. Har qanday holatda ham, 2026-yilgi mundial barcha jihatlari bilan tarixga kirishda davom etmoqda.

FIFA tashkiloti chiptalarni sotish tartibi va narxlari bo'yicha yakuniy hisobotni e'lon qilmagan bo'lsa-da, bu xabar ijtimoiy tarmoqlarda futbol ixlosmandlari orasida keskin bahs-munozaralarga sabab bo'ldi.