JCh-2026 finali: Tanaffus 30 daqiqagacha uzaytiriladi

FIFA 2026-yilgi jahon chempionati final uchrashuvi uchun an’anaviy futbol qoidalaridan chekinishga qaror qildi. Unga ko‘ra, AQSHning Nyu-Jersi shahrida o‘tadigan hal qiluvchi bahsda tanaffus vaqti odatdagidan ancha uzoqroq – 30 daqiqani tashkil etadi.

Ushbu o‘zgarish shunchaki dam olish uchun emas, balki stadionga tashrif buyurgan millionlab muxlislar hamda televizion tomoshabinlar uchun haqiqiy bayram shousini taqdim etishga qaratilgan. FIFA rahbariyati musobaqani nafaqat sport, balki eng yirik ko‘ngilochar tadbir sifatida namoyish etish niyatida.

Tanaffus vaqtida dunyo miqyosidagi yulduzlar ishtirokida katta konsert dasturi tashkil etilishi kutilmoqda. Bu format ko‘plab Amerika sport turlariga, xususan, Superboulga xos bo‘lib, futbol olamida yangi an’anaga aylanishi mumkin.

Mutaxassislarning fikricha, bunday qaror futbolning tijoriy salohiyatini oshiradi. Biroq, bu o‘zgarish sportchilarning jismoniy holatiga qanday ta’sir ko‘rsatishi va o‘yin sur’atini qanday o‘zgartirishi hamon muhokamalar markazida qolmoqda.