Liverpul chipta olibsotarlarga qarshi kurashda 432 kishini umrbod chetlatdi

Angliyaning Liverpul klubi o'z o'yinlariga chiptalarni qora bozorda sotish bilan shug'ullanadigan shaxslarga qarshi jiddiy urush e'lon qildi. Klub va Mersisayd politsiyasi hamkorligida amalga oshirilgan maxsus operatsiya doirasida 700 mingga yaqin chipta ro'yxatdan o'tish jarayonlari chuqur tahlil qilindi. Bu Premyer-ligada klub va huquqni muhofaza qiluvchi organlar o'rtasidagi ilk keng ko'lamli hamkorlik hisoblanadi.

Tekshiruvlar natijasida noqonuniy chipta savdosidan tushgan 1,2 million funt sterling miqdoridagi aktivlar muzlatildi. Ushbu mablag'lar "Jinoyat yo'li bilan topilgan daromadlar to'g'risida"gi qonun doirasida musodara qilinib, kelgusida politsiya va Ichki ishlar vazirligi o'rtasida taqsimlanishi belgilandi.

Klubning intizomiy chorasi sifatida 432 nafar shaxsga stadionga tashrif buyurish uchun umrbod taqiq qo'yildi. Ayni vaqtda ushbu ish bo'yicha ikki nafar gumonlanuvchi allaqachon sud hukmi bilan aybdor deb topilgan bo'lsa, yana bir shaxs yaqin kelajakda sud oldida javob beradi.

Ushbu holat sport olamida chipta olibsotarlariga qarshi qaratilgan eng yirik va samarali choralardan biri sifatida baholanmoqda. Liverpul rahbariyati haqiqiy muxlislar manfaatini himoya qilish va stadionda adolatli chipta tizimini saqlab qolish uchun kelgusida ham politsiya bilan yaqin hamkorlikda ishlashini ma'lum qildi.