Manchester Yunayted 100 ming o'rinli yangi stadion loyihasini tasdiqladi

Angliyaning «Manchester Yunayted» klubi o‘zining kelajakdagi rivojlanish strategiyasida muhim qadam tashladi. Rahbariyat 100 ming muxlisni o‘z bag‘riga sig‘dira oladigan yangi zamonaviy stadion loyihasini va uning aniq manzilini tasdiqladi. Ushbu inshoot klubning qadrdon stadioni bo‘lgan «Old Trafford» yaqinidagi hududda bunyod etilishi rejalashtirilgan.

Klub egalari va loyiha maslahatchilari stadion atrofidagi infratuzilmani ham zamonaviy talablar asosida qayta qurishni ko‘zlashgan. Bu loyiha nafaqat futbol uchrashuvlari, balki boshqa xalqaro tadbirlar uchun ham xizmat qiladigan ko‘p funksiyali majmua bo‘lishi kutilmoqda. «Manchester Yunayted» ushbu qadam orqali daromadlarini oshirish va muxlislar uchun qulayliklarni yaxshilashni maqsad qilgan.

Ekspertlarning fikricha, yangi arena nafaqat klub, balki butun Manchester shahri uchun yirik iqtisodiy loyihaga aylanadi. Loyiha doirasida stadion atrofidagi bo‘sh yerlar jamoat joylari, savdo va turar-joy majmualariga aylantirilishi mumkin. Hozirda loyihaning moliyaviy tomonlari va qurilish muddati bo‘yicha batafsil hisob-kitoblar amalga oshirilmoqda.

«Qizil iblislar» muxlislari uchun bu xabar juda quvonarli bo‘lishi bilan birga, tarixiy «Old Trafford» kelajagi borasida ham savollarni tug‘dirmoqda. Klub rahbariyati eski stadionning qismlarini saqlab qolish yoki uni qisman rekonstruksiya qilish masalasini ham kun tartibida tutmoqda. Har qanday holatda ham, «Manchester Yunayted» yangi bosqichga qadam qo‘yayotgani aniq.